3A hnuataber ah ulenaute, Bawipa lakah ang tuu-ih. He thute khiah a not leklo ai ngan tuh khiah kai ca ah rim i su lo i. Ikhalselai ning ca ah ning hiim ruai tu i. 2Uicote ralring tuu-ih. A pha lo napertute khai ralring tuu-ih. Vunpar cem khelte khiah ralring tuu-ih. 3Ziangmanti fangin kinte khiah taksa pum rinsan lo ai thinlung ngaingai thawn Pathian biatu le Khrih Zisu songah ang tu vunparcem te i ing. 4Kaimah in taksa pum khiah rinsan thai napui ing. Mi pakhat in amah taksa pum rinsan tuhin ruat selai kai in ani hnak in ruathnak tuh nai ing. 5Ziangmanti fangin ni riat fangin vunpar cemhnak tuar ing. Israel mi phun ing. Benjamin tesin fasin ing. Hebru mite lakah a cit Hebru mi ing. Thukham lamah Farasi mi ing. 6Judah danah zuamhnak ti singlai Khrih Pawlpui hnawmcantu ing. Thukham songai dikcanghnak lakah mawhhluk tuh um bul lo mi ing. 7Ikhalselai i miathnak thil hmuah khiah Khrih ca ah a lovang i ti in ruat ing. 8Thungai in i Bawipa Khrih Zisu linghnak thawn teh fangin thil dang hmuahhmuah khiah a lovang in ruat ing. Amah ca in he thilte khiah a lovang cangsek ai cia thilte khiah Khrih i co thillhnak tuhin a lovang hnawmborh bangin ruat ing. 9Ziangmanti fangin tunin kaimah khiah amah songah um ai Thukham songai i dikcanghnak khiah rinsan lo in Pathian ai Khrih sang manin i pehnak dikcanghnak rinsan ing. 10Tunin amah ling tuh le a tholehhnak power ling tuh i nuam i. Cen tunin amah tuarhnak rimsu le a thi bangin thihhnak khiah 11Amah bangin thihhnak in tholehhnak i co thillhnak tuhin tuar i nuam i. 12Ikhalselai kaimah veve khiah a co liang le i khim liang i ti in ruat lo ing. Ikhalselai Khrih Zisu in i pom bang ve in cia i ruathnak khiah kho ngai ai i pom thillhnak tuhin amah hlun tek ing. 13I ulenaute, zai hmuahhmuah ling liang ing ti in ruat lo ing. Ikhalselai he khiah bawn ing: Zai i ti fangin i hnua ai thilte khai hai ai i hlan ai thilte khiah zuan kongin 14Khrih Zisu songin Pathian ai i kohnak lehsawng umhmun lamah nawt ing. 15Ciamanin kin thusang khote in ciatih bangin ruat tlaang nga sing. Cen a dang ai ruat tute um le i si, Pathian in he khiah ning ling ruai tuh i. 16Ikhalselai kin ngah zohnak nundan bangin vak tek nga sing. Cen kin ruathnak khai khat nga sing.
17Ulenaute, ning veksenin i hlun tuu-ih. Cen ciatih bang ai nungtute khiah ningmah in kinte khiah a cuungtlak in ning ruat bangin ciamite khai lo hnikhnaih tuu-ih. 18(Ziangmanti fangin ning rel ciahco bangin tunin khai kap kong in ning rel ing: Mi tampui khiah Khrih thinglamteh raal bangin vak tlang i. 19Ciate in siathnak lam khiah hlun ai amahte pumpui khiah a Pathian i. Amahte in laivum thilri sawn ruat ai zakthi lo ai a hngal in um am i.) 20Ikhalselai kinte khiah vancung ram minung i sing. Ciata in Nun otu Bawipa Zisu Khrih hlir i sing. 21Amah in zai hnempuilo kin pumpui khiah, zai hmuahhmuah a kuthnia ah dah benhnak a power thawn, thangphatkul amah pumpui bangin kin thleng sah tuh i.
Ciamanin i ulenaute, i ithnak ngelngo le i ngaaihnakte, i anghnak le i sui lukhukte, Bawipa songah a kho ngai in ding tuu-ih, i ithnak ngelngote. 2Euodias le Sintikhe te khiah Bawipa songah thinkhat in um tuhin ning ngen ing. 3Cen i thilrit phurpuitu nang khai kaimah thawn kawspal thupha napertu nupuite khiah lo bawm tu. Cen nunhnak ca-uk songai a hming khumsa i naperpui a dangte le Klement khai lo bawm tu. 4Bawipa songah ang tu tio ih. Cen ang tuu-ih, ti in ning rel leh thio ing. 5Ning thinsauhnak khiah mi hmuah in ling tu seh. Bawipa khiah a nongniu ah i hang. 6A lovang thu vumah thincawl in um mah ih. Ikhalselai zai hmuahhmuah khiah anhnak thawn le ninghio kun kongin sawngenin Pathian khiah ning ngenhnak ling ruai tuu-ih. 7Fimhnak hmuahhmuah thawn ling ban lo Pathian thin nuamhnak in Khrih Zisu songin ning thin le lung khiah ning kilkhawl sah tuh i.
8A hnuataber ah, i ulenaute, a hman le a caang le a dikcang le a cianghlim le a itkul le a pha thil hmuahhmuah khiah phathnak le antlak lekhaw hete khiah lo ruat tuu-ih. 9Cen i hnenai ning zirhhnak le ning ngahhnak le ning zahnak le ning hmuhnak khiah bawn tu i lai thinnuam petu Pathian khiah ning hnenah um tuh i. 10Ningte in kaimah i bawm leh manin Bawipa songah a tam rauh in i ang i. He hlanah khai i bawm ning nuam napui ai a khuan ngah lo i si. 11I sam manin ning rel i lo ing. Ziangmanti fangin zai bang i cangta in khai thinnuamniu ai um tuh khiah zirzo ing. 12Thil nai lo le thil tampui nai ai nundan khai ling zo ing. Cen a konah khai i tu seh zaizongza ah rong-
kham le rikam le thil naibial le samhnak tuar dan khai i cuk zo i. 13Tha i petu Khrih songin zai hmuahhmuah bawn thill ing. 14Ikhalselai ningte in i rimsu tengin i bawm manin ning an ing. 15Cen ning Filip minungte in Masidonia ah kawspal thupha a pan ngom tazahaw tuhai i feh fangin ningte lo pawl dang aisu in khai a pe lam le a ngah lam ah i bawm lo i. 16Ziangmanti fangin Thesalonika rinah velkhat i kuat ai i sam fangin i kuat leh thio i si. 17Cia khiah lehsawng i daih manin i lo ai ning tangka khawl hmunah a thai tamngai um i daih manin i. 18Ikhalselai zai hmuahhmuah nai liang ing. A tam rauh in nai ing. Epaphrodaitus hnenai ning kuathnak a rimhmui Pathian lungkhimhnak le Pathian in ning saangsahhnak hibawlhnak ning thilte khiah ngah manin i dim i. 19Ikhalselai vancung ai a lianhnak bangin i Pathian in ning samhnak khiah Khrih Zisu songin ning pe tuh i. 21Khrih Zisu songai micianghlimte khiah upat tuu-ih. Kaimah thawn ai umtu ulenaute in hnuk ning sat i. 22Mi cianghlimte hmuahhmuah le Sizar innkuate berber in ning upat i. 23Kin Bawipa Zisu Khrih ngaihharhnak khiah ning veksen hnenah um tu seh. Amen.