9 Khrih songin a hman thu ning rel ing. Thudon ning rel lo ing. I thin songai ruathnak khiah Ciang Rauhla in khai i ling sah i. 2Zai i ti fangin a catlo in i thin songah lungsia le thinrit rauh in um ing. 3Ziangmanti fangin i mi phunpui i unau Judah mite ca in Khrih hnenin kumzangza i pai lio selai ciarin i nuam i. 4Amahte khiah Israel minung i le Pathian fate bang ai cawmhnak, thangphathnak, Pathian thukham le dante le hmailam ca ai khamhnak thute khiah amahte ca ai pehnak i. 5Cen amahte khiah kin paapuite fate i. Cia paapuite songin Khrih khiah minung bang in te ai cia Khrih khiah zai hmuahhmuah uktu Pathian i. Amen.
6Cia heh Pathian relhnak thu khiah a lovang cang lio i lo i. Ziangmanti fangin Israel songai tehnak hmuah khiah Israel minung i lo i. 7Cen Abraham songai te tute hmuah khai Abraham fate i lo i. “Aizek song ai tehnak te lek khiah na ci ti in ko tuh i.” ti in ti i. 8Ciaheh zai ti ca i ti fangin, minung songai te tu hmuahhmuah khiah Pathian fate i lo i. Pathian ai khamhnak thu bang ai tehnak lek khiah Abraham fate i. 9Cia Pathian in hetih bang in thu kham i: “Tunhnua tun camcu fangin na tlawng leh tuh ing. Ciafangin Sarah in fapa niu cawi tuh i.” ti in thukham i. 10Cialek i lo ai Rebekka in kin paa Aizek fa paai fangin, 11Cia fate khiah te rin te lai lo manin, a pha le a hnawm khai bawn napui lai lo ai, Pathian ai rilhnak le Pathian ai kohnak khiah naper ai hlawhhnak tahin thupui sawn i ti larhnak tuhin 12Rebekka hnenah, “Na fa upa sawn in a nauta sawn hnenum cang tuh i.” ti in rel i. 13Cia khiah, “Zakuk tu it ing. Issau tu hua ing.” ti ai nganhnak bangin i.
14Ciailekhaw zai ti nga sing? Pathian khiah a dikcang lo i aw im? I zel hlah. 15Ziangmanti fangin Moses hnenah, “I nuamhnak te khiah ninghio tuh ing. I nuamhnak te khiah ngaihhar tuh ing.” ti in rel i. 16Ciamanin minungte nuamhnak le minungte zuamhnak thu i lo ai ngaihharhnak pe tu Pathian thu i. 17Lai Cianghlim in Pharaoh hnenah hetih in rel i: “I power khiah na songin laarruai tuh ing. Ciafangin i hming khiah laivum mi hmuahhmuah lakah thaang tuh i. Cia ca ai na bawn ing.” ti in ngan i. 18Ciamanin Pathian in a ngaihhar nuam te khiah ngaihhar ai a nuamhnak te vumah thinruhhnak pe i. 19Ciailekhaw “Zaimanin Pathian in mawh kin sii i lai? Aisu in a nuamhnak khiah el thill i?” ti in i ti tuh i si. 20Ciatih ai Pathian sawn tu nang tu aisu i pa si? A bawnhnak pa in a bawntu pa hnenah, “Zaimanin he bang ai i bawn i si?” ti in ti tur im? 21Bel bawn tu pa in, laisawr pum khat songin upat tlak bel le ningdulkul bel bawn thillhnak thu nai lo im? 22Cia heh Pathian in a thinrawhnak khiah hmuh nuam manin le a power ling ruai nuam manin a thinraw ruaitu belte khiah khoi ruai berh tlak napui ai khoi lo in thinsau ngai in tuar selai, 23Cen a hlanvomin thangphathnak ngah tuhin a bawn ciahnak ngaihharhnak belte vumah a thangphathnak lian ngai khiah hmuh nuam selai, zai i tur? 24Cia belte khiah Pathian ai kohnak Judah mite lek i lo ai Zental mite khai i ve i. 25Pathian in prawfet Hosea songin hetih bangin rel awng i:
“I minung lo te khiah i minung ti in ko tuh ing.
I it lohnak te khiah i ithnakte ti in ko tuh ing.
26 Cia ningte khiah i minungte i lo i si, ti ai
rel hmunah amahte khiah pathian fate ti in
ko nia hleng tuh i lai.” ti in rel awng i. 27Isaiah in Israel mite khiah hetih bang in ngan i:
“Israel fate khiah varkam ai runsiat zah
inapui ai a tlawmniu lek in ohnak ngah tuh i.
28 Ziangmanti fangin Pathian in laivum mite
khiah a rang ngai in le a dikcang ngai in
thukhan tuh i.” ti in ngan i.
29Cen Isaiah in hetih bangin rel leh thio i:
“Bawipa Pathian in a ci kin hlup tahlahselai,
Sodom le Kawmawrrah bang kin cang tuh zo napui i.” ti in rel i.
30Ciailekhaw zai ti nga sing ? Zental mite in dikcanghnak rin sii napui lo ai amahte sanghnak manin dikcanghnak khiah ngah i. 31Ikhalselai Israel mite in Thukham songai dikcanghnak khiah sii napui ai cia Thukham songai dikcanghnak khiah ngah lo i. 32Zaimanin ngah lo i? Aw amahte in sanghnak thawn sii lo ai naper in hlawh tum manin ngah lo i. Ciamanin amahte khiah bah ruaitu lungto khiah sui ai bah i.
33Cia khiah,
“Zion ah mi bah ruaitu lungto le a sui thai
lungto pui dah tuh ing.
Cia amah sangtu hmuahhmuah in zakthi
tuh lo i.” ti ai nganhnak bangin i.