1Anite khai Amphipolis le Apollonia ram songin feh ben fangin, Thessalonika ah hleng i. Ciata ah Judah sanginn pakhat um i. :Paul khai amah dan bangin amahte hnenah kawi ai, zarh thum song sabbath nia ah amahte thawn Lai Cianghlim khiah siar ai 3Khrih in tuar kul ai thihhnak in tholeh ai, “He ning hnenai i relhnak Zisu khiah Khrih i.”ti in rel i. 4A hrekkhatte in sang ai Paul le Sailas thawn kom i. Cen Greek mi tam ngai le nupui upa tam ngai in khai sang ve i. 5Ikhalselai a sang lo tu Judah mite in amahte khiah iksik ai mi siavate kawih ai hmunkhat in taai tlang ai khua song pumpalah hnaihnqk mai bial ai Jason inn ah kawi ai amahte khiah mite hnenah kawih tuh in sii i. 6Amahte tawk lo fangin Jason le thusangtu ulenaute hrekkhat khiah khua uktute hnenah duk ai, “Laipua vum bungbaleh tu hete khai heta ah hleng ve i hang. 7Ciate khiah Jason in a innah tlung ruai ai hete in, ‘Zisu tihnak kumpibawi a dang pakhat um i.’ ti in rel ai Sizar, thukham thawn kaih lo in hete in nung i.” ti in ti i. 8Ciatih in anite in he thu zatu te mi dangte le khua uktute khiah thin hnaihnok ruai i. 9Jason le a dangte hnenin amah khanhnak tangka lang ben fangin amahte khiah hlat i. l0Thusangtu ulenaute in Paul le Silas khiah zanlai in Berea ah feh ruai vut ai ciata ah hleng fangin Judahte sanginn ah anite khai kawi i. 11Heta ai Judah mite tu Thessalonika ai Judah mite tahin mi nun pha sawn pawl i manin Pathian thu khiah umm ngai in ngai ai a peu maw a peu lo i na maw ti in Lai Cianghlim khiah nisiar in sii i. 12Ciamanin mi tam ngai in sang ai, Greek nupui upate le pasalpui tam ngai in sang ve i. 13Ikhalselai Thessalonika ai Judah mite in Paul in Berea ah Pathian thu tazahaw i ti za fangin, anite khai kawi ai ciata ai mite khiah hnaihnok leh thio i. 14Ciafang in thusangtu ulenaute in Paul khiah tipui hmun lamah kawih ai Silas le Timote tu cia khua ah taang hlen i. l5Cen Paul fehpui tute in Paul khiah Athens khua ah kawih i. Silas le Timote khiah a hnenah a fang tawp in kawi tuhin Paul in cah ben fangin anite khai feh i. 16Paul in amahte khiah Athens in haak teng fangin a khua sen a vuva in mi zuk bia ai um hmu ai a thin hnaihnok rauh i. l7Ciamanin Judah mite thawn sanginn songah le Pathian kihtu Greekte hnenah le dawr ai tawkhnak mi hmuah thawn nisiar in thu eldun i. 18Ciafangin Epikuria le Stoik mifimte in Paul thawn thurel fangin a hrekkhatte in, “He pong tam pa in zai rel i pa?” ti in ti ai a hrekkhat in, “Pathian thar thu rel thawn bang i.” ti in ti i. Ziangmanti fangin Paul in amahte hnenah Zisu le a tholehhnak thu rel i. l9Ciamanin Paul khiah Areopakus council hnen ah kawih ai, “Na relhnak he thu thar ling kin nuam i. 20Ziangmanti fangin kin naa ah thu thar kin hlen i si. Ciamanin zai thu i ti ling kin nuam i.”ti in rel i 21(Ziangmanti fangin Athens mite le cia khua ai khualtlawng zintlung te in amahte tikcu khiah thu thar rel’ tuh le thu thar za tuh ian in hmang i.) 22Ciafangin Paul khai Mars mual lai ah ding ai, “Ning Athens mite, ningte in zai hmuahhmuah ah dan nai ze i si. 23Ziangmanti fangin i vak kong in ‘KIN LING LOHNAK PATHIAN’ ti ai nganhnak ning biahnak altar cabuai pakhat khai hmu ing. Ningte in a ling lo ai ning biahnak Pathian khiah ning ling ruai ing. 24Pathiah in lai vum le a song ai um tu hmuah bawn ai, amah khiah van le lai vum’ Bawipa Pathian i manin kut ai sahnak temple songah um lo i. 25Cen minimgte kut in khai amah khiah naper sah kul lo i. Ziangmanti fangin amah in nunhnak le haihawh le zai hmuahhmuah kin pe manin ani in a kulhnak nai lo i. 26Mi phun hmuahhmuah khiah laivum pumpalah ah um tuhin thisa khat in kin bawn zo i. Cen zai cam tian nung tuh le amahte umhmun tuh khai a hlanvom in bawn cia zo i. 27Ciamanin amahte in Bawipa Pathian khiah sii tuh ai amah khiah khing tuh ai tawk tuh i. Ikhalselai amah khiah kinte thawn hla ngai ah um lo i. 28Ziangmanti fangin kin te khiah amah song ah umai mer ai nung i sing. Cia khiah ning lapuah tute in khai, ‘Kinte khai amah fate i ve i sing.’ ti in rel awng ve i. 29Ciamanin kinte khiah Pathian fate kin i manin Pathian hmel khiah minung ai bawnhnak sui le ngun le lungto zuk bang in ruat tuh mawi lo i. 30He hlan ah ciatih ai ling awng lo fangin Pathian in mitkhep in sik rih awng i. Ikhalselai tuntu aisu hmuahhmuah sualsir ruai i. 31Ziangmanti fangin Pathian in laivum khiah dikcang ngai in thukhan nia le a khantu tuh pa haih zo i hang. Ciamanin mite veksen in sang thill hnak tuhin cia pa khiah thih hnak in tho ruai leh zo i.” ti in rel i. 32Anite in a thite tholehhnak thu za fangin a hrekkhat te in hnihcip ai a hrekkhatte in, “He thu khiah na ngai leh tuh i ing.” ti in ti i. 33Ciamanin Paul khai amahte hmun in thawn i. 34Ikhalselai. mi hrekkhate in amah khiah hlun ai sang i. Ciate lakah Aeropakus pa pakhat Dionisius le Damarius tihnak nupui le mi dang tam ngai um i.