1Ciatih in amahte in mite hnenah thurel teng fang in phungkite le temple kiltu raalbawipa le Sadusite khiah amahte hnenah hleng ai, 2Amahte in mite thucuk ai Zisu khiah thihhnak in tholehhnak thu tazahaw manin anite khai thin hnaihnok rauh i. 3Amahte khiah pom ai zanlam manin a thangha tian thawng hla i. 4Ikhalselai cia thu zatute tamngai in a relhnak thu sang ai, a sang tute khiah thawng nga tha i. 5A thangha fangin amahte uktutte le upate le upadi dan cuktu sazate le 6 Phungki upa Annas le Khaiaphas le John le Alexander le phungki pa ulenaute tamngai khiah Jerusalem ah pumkhawm tlaang i. 7Amahte khiah amahte laiteng ah dah ben fangin, “Aisu power le aisu hming in he khiah bawn i si?” ti in zawt i. 8Ciafangin Peter khai Ciang Rauhla thawn dim ai amahte hnenah, “Ning mi-uk tute le Israel upate, 9Tun nia ah he mi ur pa vumah na pha kin perhnak le aisu hming in cakruai i ti kin zawt i leisikhaw, 10Ningte le Israel minung veksenin lo ling tuu-ih. Ningte in thinglamteh vumah tar ai thihhnak in Pathian in tho ruai lehhnak Nazareth Zisu hming in he pa a cak in ning hmai ah ding i ti ling tuu-ih. 11He khiah ning innsa tute ai zainam lohnak lungto i ai a thupui ber inn ning lungto cang i. 12Cen mi dang songin ohnak um lo i. Ziangmanti fangin vanhang hnia ah kin o tu tuhin minungte hnenah hming dang pe lo i.” ti in rel i. 13Amahte in Peter le John raalphahnak hmu ai lai ling lo le mivoi i ti ling fangin ngaihsunur tlang i. Cen Zisu thawn umkhat awng i ti khai hih i. 14Cen amahte thawn a cakruaihnak pa khiah ding in um loi manin amahte in zai rel tuh khai nai lo i. 15Ikhalselai amahte khiah councilte hmunin suak ruai ben fangin amahte tlaangtlaang thusawm ai, 16 “Hete vumah zai bawn nga sing? Ziangmanti fangin ngaihsunurkul bawn zo khiah Jerusalem ai umtu mi hmuah in ling ai kinte in cia khiah el thill lo i sing. 17Ikhalselai he thu khiah mite lakah zaai lohnak tuhin he pa hming in aisu hnenah khai thurel tuh lo in lau ruai nga sing.” ti in rel tlaang i. 18Amahte khiah ko ai Zisu hming in thu khai rel tuh lo ai thu khai cuk tuh lo in kham i. 19Ikhalselai Peter le John in amahte hnenah, “Pathian hnak in ning thu sawn ngai tuh khiah Pathian hmai ah hman le hman lo ruat tuu-ih. 20Ziangmanti fangin kin hmuhnak le kin zahnak khiah rel lo in um thill lo i ing.” ti in rel i. 21Ciamanin amahte khiah lau ruai ben fangin hlat i. Ziangmanti fangin a kontih bangin cawh tuh hnak khiah tawk lo i. Ziangmanti fangin mi hmuahhmuah in a bawnhnak manin Pathian thangphat i. 22Ziangmanti fangin he ngaihsunurkul cakruaihnak ngah tu pa khiah kum sawmli vum i. 23Ciamanin anite khai amahte pawlte hnenah feh ai phungki upate le mi upate in amahte hnenah relhnak hmuahhmuah rel sio i. 24Anite in cia khiah za fangin, thin khat lung khat in Pathian hnenah aw cawm ngai thawn, “Bawipa, nangmah khiah lai le van le tipui le a songai hmuahhmuah bawn tu Pathian i si. 25Na hnenum David kaa songin, ‘Zaimanin Zental mite in thinraw i? Zaimanin minungte in thu lovang ruat hnelhno i? 26Laivum kumpibawite khai tho ai, mi-uk tute in Bawipa Pathian le amah Khrih tawng tuhin hmunkhat in khawm tlaang i. 27Ziangmanti fangin na rilhnak a cianghlim na hnenum Zisu tawng tuhin, he khua songah Herod le Pontius Pilate le Zental te le Israel minungte khiah 28Na kut le na nuamhnak ai bawnciahnak te khim ruai tuh in hmunkhat in khawm awng i. 29Cen tunin, Bawipa, anite ai kin lau ruai tuhin ponghnak khiah lo hih sah tulai, na cengfate in na thu khiah sangkho in rel thillhnak tuh a khuan pe in, 30Na kut in cakruai in, na cianghlim hnenum Zisu hming in ngaihsunurkul le hnikhnaihhnak lo bawn tu.” ti in ti i. 31Amahte in sawngen ben fangin, amahte khawm hmun khai hlin ruai ai amahte khiah Ciang Rauhla thawn in dim ai Pathian thu khiah raalpha ngai in rel pan i. 32Ciafangin a sangtu miburpui khiah thin khat le lung khat in um tlaang ai, aisu in khai amahte naihnak thilte khiah amah ai i ti in ruat lo ai a veksenin zai hmuahhmuah hmunkhat in nai tlaang i. 33Power lian ngai thawn apawstalte in Bawi Zisu tholehhnak thu khiah tettikhan ai ngaihharhnak lian ngai khiah a veksen in co tlang i. 34Amahte lakah aisu in khai sam hnak nai lo i. Ziangmanti fangin loram le inn naitute in a loram le inn khiah zuar ai a man khiah, 35Apawstalte ke ham ah pum le aisu hmuahhmuah khiah amahte kulhnak bang in zem i. 36Saipras ram mi Levi pakhat khai apawstalte in Barnabas (cia khiah mi thinnuam ruaitu fapa tihnak i) ti ai kohnak Joseph khai 37Loram nai ai cia loram khiah zuar le a tangka khiah kawih ai apawstalte ke hamah pum i.