Mitcaw ai tehnak pa thu
1Zisu khai ciata in kheel fangin a te pah ai mitcaw pa pakhat hmu ai, 2A hnuahlunte in amah khiah, “Saza pa, he pa mitcaw ai te heh amah sual man in maw a nuu le paate ai sual man in i?” ti in zawt i. 3Zisu in, “He pa ai sual man in khai i lo i. Cen a nuu le paate ai sual man in khai i lo i. Ikhalselai amah songin Pathian naper larhnak tuhin i. 4I hlattu pa ai naper khiah khuavaar lai in per tuh ing. Khuathim fangin aisu in khai naper thill lo i. 5Laivumah i um song hmuah in kaimah khiah khuavaar ing.” ti in ti i. 6Ciatih ai a rel ben fangin, ani in laipua ah cilthuih ai, laisawr bawn le cia laisawr thawn mitcaw pa mit nawih i. 7Ciafangin cia pa hnenah, “Siloam tihnak thikhur ah feh tulai som tu.” ti in ruai i. (Siloam tihnak khiah, Kuat i, ti ca i.) Ani khai ciaman feh le som le khuahmu lio i. 8Ciamanin a ompuite le a mitcaw teng in a hmu awng tute in, “He pa heh to ai tadaungca i lo im?” ti in ti i. 9Mi hrekkhatte in, “He pa khiah amah i.” ti in ti ai a dangte in, “Amah khiah cia pa bang i.” ti in ti i. Ciafangin mitcaw pa in, “Kaimah khiah khia pa ing.” ti in ti i. 10Ciamanin amahte in amah hnenah, “A kontih in khua hmu i si?” ti in zawt i. 11Amah in, “Zisu tihnak pa in laisawr bawn ai i mit ah nawih le ciaben fangin cia pa in, ‘Siloam tikhur ah feh tulai som tu.’ i ti i. Kai khai feh ai som le khuahmu lio ing.” ti in sawn i. 12Ciafangin amahte in cia pa hnenah, “Cia pa khiah a konah i?” ti in zawt ai cia pa in, “Ling lo ing.” ti in sawn i.
Mitcaw awngtu pa hming phiat i
13Amahte in mitcaw awng pa khiah Farasite hnenah kawih i. 14Zisu in laisawr bawn ai a mit hong sah nia khiah sabbath nia lo i. 15Ciafangin Farasite in khai a kontih in khuahmu i si ti in cia pa khiah zawt leh thio i. Cia pa in amahte hnenah, “Amah in laisawr khiah i mit ah dah ai i som ruai le khua hmu ing.” ti in ti i. 16Ciaman Farasi hrekkhatte in, “He pa in sabbath nia ul lo manin Pathian minung i lo i.” ti in ti i. A hrekkhatte in, “Mi sualpa in he bang ngaihsunurkul bawn thill tuh im?” ti in ti ai amahte tlaangtlaang khai el dun i. 17Amahte in mitcaw pa hnenah, “Na mit hong tu pa khiah aisu i ti in ruat pa si?” ti in zawt leh thio ai amah in, “Amah khiah prawfet pakhat i.” ti in sawn i. 18Ikhalselai Judah mite in amah khiah mitcaw awng ai khuahmu leh i ti sang lo man khuahmu leh tu pa ai nuu le paate ko ai, 19Amahte hnenah, “He pa khiah mitcaw ai tehnak pa ning tihnak ning fapa im? A kontih in khuahmu i?” ti in zawt i. 20Cia mi nuu le paate in, “He pa khiah kin fapa i ai mitcaw ai te i ti khiah ling i ing. 21Ikhalselai a kontih in khuahmu i ti tu ling lo i ing. Cen aisu in a mit hong sah i ti khai ling lo i ing. Amah khiah kum khim zo i. Amah zawt tuu-ih. Amah in amah ca pong tu seh.” ti in ti i. 22Judah minungte kih manin a nuu le paate in hetih bangin pong i. Ziangmanti fangin Judah mite in Zisu khiah Khrih i ti ai phuang tu hmuah sanginn pawl songin suah tuh lio in lungkhim tlaang cia i. 23Cimanin a nuu le paate in, “Amah khiah a kum khim zo i. Amah khiah zawt tuu-ih.” ti in ti i. 24Ciafangin anite in mitcaw awng pa khiah ko leh thio ai amah hnenah, “Pathian khiah thangphat tu. He pa khiah misual i ti ling i sing.” ti in ti i. 25Ciafang in cia pa in, “Amah khiah misual le sual lo tu ling lo ing. Ikhalselai linghnak pakhat nai ing. Mit i caw awng rih ai tuntu khua hmu i hang ing.” ti in ti i. 26Ciafangin amahte in amah hnenah, “Amah in na vumah zai bawn i? A kontih in na mit na hong sah i?” ti in zawt leh thio i. 27Cia pa in, “Ning rel zo ai ngai ning nuam lo i. Zaimanin ngai ning nuam leh thio i? amah hnuahlun cang ning nuam ve im?” ti in sawn i. 28Ciafangin amahte in amah khiah zauhsuam ai, “Nang tu ani hnuahlun i si. Kin tu Moses hnua hlunte i ing. 29Pathian in Moses hnenah pong i. Ikhalselai he pa tu a konin hleng i ti khai ling lo i ing.” ti in ti i. 30Ciafangin cia pa in amahte hnenah, “Ciaheh ngaihsunurkul ngai i: ningte in amah khiah a konin hleng i ti ling lo i si. Cia ani in i mit i hong sah i. 31Pathian in misual te khiah ngai lo i ti ling i sing. Ikhalselai mi pakhat in Pathian bia in a daihhnak bawn lekhaw, Pathian in cia pa khiah ngai sah i. 32Mitcaw ai te hnak pa mit khiah mi dang pakhat in hong sah i ti khiah laivum po ngom ai panin zaikom in khai za awng lo i. 33He pa heh Pathian minung ihlahselai zaikhai bawn thill tuh lo i.” ti in ti i. 34Amahte in amah khiah, “Sualhnak thawn na te ai thu kin cuk tum i sim?” ti in sawn ai a hming phiat i.
35Amahte in cia pa hming phiat i ti khiah Zisu in za ai amah tawk fangin, amah hnenah, “Pathian Fapa khiah sang aw sim?” ti in zawt i. 36Cia pa in, “Bawipa, amah i sang thillhnak tuhin amah khiah aisu i pa?” ti in sawn i. 37Ciafangin Zisu in, “Nangmah in amah khiah hmu zo ai amah khiah nangmah thawn ai pong tu pa i.” ti in rel i. 38Ciafangin cia pa in, “Bawipa, sang ing.” ti in ti ai amah khiah bia i. 39Ciafang in Zisu in, “Thukhan tuh in laivum ah hleng ing. Ciamanin mitcaw te in khuahmu tuh ai khuahmu te khiah mitcaw tuh i.” ti in ti i. 40Amah thawn umtu Farasite in a relhnak za fangin, amah hnenah, “Kin tang mit kin caw i awm?” ti in ti i. 41Zisu in amahte hnenah, “Mit ning caw selai sualhnak nai tuh napui lo i si. Ikhalselai tuntu, ‘Khuahmu i ing.’ ti in ning ti manin ning sualhnak khiah ning hnenah um ngio i.” ti in ti i.